مليان مقالات مليان

الله بالخير!

يابة اني فاطمة ياسر انسانة تريد تتعب ع نفسها بس تتعاجز ف شنو كلت اشارك بتحدي ال29 يوم.

اني تخرجت ب 2019 من كلية اللغات اللي جان المفروض اني تعلمت بيها اترجم، بس مع الاسف ما طبقت اللي تعلمتة.

ف قررت اجرب اتحدى نفسي واترجم مقالات حتى هم اتعلم اشياء حلوة جديدة وهم اجرب اترجم اشياء ما متعاملة وياها قبل.

بعد ما تخرجت اشتغلت بمجال التعليم لمدة سنة تقريبا، وبالوقت اللي لاحظت انو اني مستمتعة بالتعليم  حسيت انو خلص صارت منطقة راحة ومحتاجة اطلع منها واجرب شي جديد، واني دائما احب من ابدي شي اكملة للنهاية اضوج اعوفة عالنص واحسن طريقة الي حتى انجز شي هوة انو اكابلة وخلص ما اسوي شي غيرة لحد ما يخلص.

ولهالسبب قررت اترجم مقالة كل يوم لمدة 29 يوم، وراح احاول كل جهدي احقق هذا الهدف، واذا كلش كلش ما كدرت اريد اطلع بما لا يقل عن 20 مقالة مترجمة.

خليت هذا التحدي لنفسي حتى استخدمة كدافع ثاني حتى افوز بمسابقة دا اشارك بيها، وهي مسابقة مشروع بيت الحكمة لترجمة مقالات ويكيبيديا وتوفير المحتوى العربي الها. ولاحظت انو غالبا ما الي واهس اكعد اترجم وشي واظل اتعاجز وهية هم فد شهر وتخلص مدتها واريد استغل السالفة واجبر نفسي اترجم.

اني هم مؤخرا بديت اتطوع كمترجمة بصفحة ع الفيسبوك اسمها العراقي العلمي، وجنت كلش فرحانة من شفت اول مقالة تترجمت وبالنهاية مكتوب عليها اسمي، وردت استمر اعيش هاي اللحظة وترجمت يمكن 4 او 5 خلال اسبوعين، فراح استغل منصة العراقي العلمي حتى  انشر المقالات كتحديث للاداء مالتي وهمات حتة احس بالانجاز انو الللله هاي اني هلكد مترجمة؟ 

وهاي لحظة افتخارية لازم انشرها ف هاي سكرين مال ناس فرحانة:

وهذا رابط المقال اذا تحبون تقروه، يحجي عن شلون ممكن الانسان يعيش لمدة 150 سنة:

https://www.facebook.com/1082950398428917/posts/4377733708950553/

وهاي مقال مال حبشكلات فيزيا وكم وهالسوالف هم اني مترجمتها:

https://www.facebook.com/1082950398428917/posts/4412853072105283/

وهذا مقال مال شلون العلماء كدرو يرجعون بالزمن باستخدام حاسوب كمومي:

https://www.facebook.com/1082950398428917/posts/4428184097238847/

وهذا مقال كلش حلو يكول ليش انت يمناوي لو يسراوي:

https://www.facebook.com/1082950398428917/posts/4434145066642750/

وان شاء الله اثبركم ثبر بالريبورتات وانزللكم لنكات مقالاتي المستقبلية