خلصت 10 ايام والمقالات تبجي بالزاوية

 

الله بالخير مرة ثانية!

خلصت 10 ايام من تحدي ال29 يوم، اللي قررت بيه اطور مهاراتي بالترجمة من خلال ترجمة مقال بكل يوم، جان هدفي اوصل عالاقل 20 مقالة بس الصراحة صارت شوية تغييرات بالخطة. تعالو اسولفلكم شسويت:

مشيت اول ايام حسب مخططي القديم وترجمت مقالتين ونص، وبعدين ورة فترة اجتني فرصة اترجم فديوات وجانت هاي نقطة تحول بالتحدي مالتي. هاي جانت تجربة جديدة الي واحتاجيت اجمع معلومات، فبديت ادور ع مواقع وتطبيقات تفيدني بالترجمة وجانت تجربتي وياها بالبداية بسيطة على هذا الفديو القديم عندي:

ف بعد هالتجربة العنونة تحمست وكملت بنفس الموقع وتالي تقريبا انضربت بيه بوري وتكدرون تلكون تفاصيل البوري المعدل بهذا البلوك،  فالمهم رجعت دورت ع برامج ثانية استخدمها للترجمة فلكيت agisubs ,وتعلمت شلون استخدمة من هاي القناة الحلوة واشتغلت لحد الان اكثر من 45 دقيقة، وهسا هاي نتائج شغلي:

وجان شعور كلش مفرح الي من دا اتعب واجتهد والاحظ فرق، وانتبهت انو من اكعد اشتغل هيج انفصل عن العالم الخارجي واستمر ولا عبالك كاعدة اشتغل لساعات، وهذا شي جنت اعاني منة ببداية التحدي لان مجان الي واهس قوي هيج من جنت اترجم المقالات. صرت اترجم أسرع والكة المفردة المناسبة بشكل أفضل بهواي وهالشي ما تطلب مني اكثر من كم يوم. هاي اول مرة صدك اطلع من منطقة راحتي واعتمد ع نفسي واحقق شي جنت شايفتة كلش صعب وكلش مستحيل، خاصة الالتزام! جان عبالي هذا شي مستحيل اسويه، بس الظاهر جنت دا ادور بالمكان الخطأ. 

من الاشياء اللي ممتنة الها بهذا التحدي هو انو بديت اتعود اسأل الناس من احتاج مساعدة وما اتراجع لان استحي. وكذلك ممتنة لان هذا التحدي ديجبرني اكتب وانشر واشارك افكاري بدون ما اقلق او اتوتر، لان هاي مشكلة اعاني منها نفسيا ودائما اكتب منشورات ومسجات وامسحها بسبب هالمشاكل، وهذا التحدي خلاني اشوف انو الناس مراح تاكلني لان نشرت شي.

ومن ورة كل هالانجازات اللي سويتها بترجمة الفديوات قررت انو يكون هدفي انو اترجم عالاقل 4 فديوات كاملة طول الواحد منها 20 دقيقة تقريبا، وبعدها ارجع للمقالات واترجم اكبر عدد اكدر عليه، لان بالنهاية اني دا اوصل لهدفي بتطوير مهارتي بالترجمة، وفوكاها دا اتعلم اشياء ومهارات جديدة.

هدفي بالايام الجاية او حتى لو بعد مينتهي التحدي هو ان اسوي فديو تعليمي بسيط اشارك بيه الخطوات والادوات وشلون اختاريت واستخدمت البرامج بترجمة الفديوات حتى تكون متوفرة للي يتحدثون العربية فقط وميبقون حايرين وين يبدون.