خلص تحدي ال29 يوم! تعالوا شوفوا شسويت

 

مرحبااا جميعا!

هم فد يوم قررتوا تتحدون نفسكم تحدي والتزمتو بيه؟ تعالوا شوفو تجربتي وي تحدي ال29 يوم.

بيوم من ايام الحياة السعيدة واني مكنكة واكلب عالانتسا لكيت انو مرتضى التميمي مسويلنا تحدي مغري وبيه جوائز حلوة وشي وكلت ليش ما اجربة؟ جان التحدي انو كل واحد يقرر ع شي معين يريد يطورة ويلتزم بيه خلال 29 يوم ويشارك الجميع تجربتة.

يابة اني فاطمة ياسر انسانة تحب تسوي لروحها واهس ولكيت فرصة مناسبة استغل الوضعية هم اني دا اشتغل ع نفسي وهم دا اشارك بالتحدي. نسختي من التجربة جانت انو اترجم مقالة كل يوم لمدة 29 يوم، والهدف اكيد هو ان اطور مهارتي بالترجمة لاني كلش احبها بس ظروفي مجانت تناسبها.

شي اكيد حتى اكمل احتاجيت حافز، فقررت اترجم مقالات مع فريق العراقي العلمي حتى اولا اجبر نفسي انجز وثانيا اطلع من منطقة راحتي فيما يخص النصوص اللي اشتغل بيها، وهالشي كلش فرق علية! خاصة من اشوف اسمي مذكور بنهاية المنشور وافتخر بنفسي وبإنجازي مهما كان صغيروني.

ورة كم يوم تقريبا من التحدي اجتني فرصة عظيمة ان اشتغل وي منظمة عالمية بموضوع ترجمة، تخيلو نيتي شكد صافية ايبااااه.

 وعليه اني غيرت من نص التحدي مالتي وصار ان اترجم 4 فديوات اللي طلبتها مني المنظمة مع 20 مقالة عالاقل. خلال هاي الفترة اشتغلت وطورت نفسي بالترجمة بشكل رهيب، تعلمت شلون اسوي ترجمة بالفيديو وتعلمت شلون اضبط الوقت وي الصوت، ولاحظت شكد اني جنت مهتمة ومستمتعة بترجمة الفديوات ف جان شي جدا جميل وجزء مهم من تجربتي.

ورما خلصت الفديوات رجعت للمقالات وبديت اعرف اختار المواضيع المثيرة للاهتمام اللي الناس تحبها وتخليها تقرة المقال، وهمات عودت نفسي ابحث واتعلم مفردات للنصوص اللي ممترجمة شي مشابه الها قبل وهالشي خلة طريقة تفكيري وحصولي عالمفردة المضبوطة اوسع واشمل.

تعلمت هواي اشياء عن نفسي بهاي الفترة اللي مجانت مختصة بالترجمة فقط، وانما تصرفات اسويها بالواقع وعالنت على الرغم من انو هية ما المفروض تصير هيج.

زين، شنو نتائج شغلي؟

يا ناس ترجمت 5 فديوات يوصل طولهن تقريبا 100 دقيقة! ووي كلشي ترجمت هم 20 مقالة بينهم اللي منشور واللي ما منشور.

الفديوات معندي تصريح انشرهن :( بس المقالات كلها تلكوها هنا بصفحة العراقي العلمي.

بهاي الفترة زدت مفرداتي وزدت معلوماتي وضاعفت سرعة شغلي. يعني الصفحة اللي جانت تاخذ مني ساعة حتى اترجمها صارت تاخذ نص ساعة بس، والفديو اللي جان ياخذ مني يومين صار ياخذ يوم واحد ومرات حتة بكعدة وحدة.

زييييين هل سهل ام صعب انو الواحد يتعلم يترجم فديوات؟

كلش كلش سهل، خاصة اذا تسأل مجرب وتعرف شستخدمو قبلك.

اذا تحبون تعرفون تفاصيل البرامج اللي استخدمتها عدكم هذا البرنامج للترجمة agisubs

وبهاي القناة تعلمت شلون استخدمة دوسو هنا 

وهذا البرنامج لدمج الترجمة وي الفديو handbrake

وبهذا الفديو تعلمت شلون ادمجهم دوسو هنا

وراح تلكون تفاصيل هواي عن التجربة بشكل عام بهاي المدونة دوسو هنا

زييييين، شنو تعلمتي يا فاطمة بهذا التحدي؟

من غير البرامج وشكد انو سهل الواحد يلكة حلول لاستخدامها، تعلمت شغلتين مهمات كلش كلش:

1. ديرووو بالكم من المواقع المجانية اللي ممكن تدك بيكم الناقصة، قبل لتشتغلون بمشروع فعلي جربو الموقع بما فيه الكفاية.

2. لتخافون تسألون ولا تستحون، اندفعوا وسألوا وطلبو المساعدة لان ماكو شي بالدنيا يسوة انو نمنع نفسنا من التعلم.

وغير هيج تعلمت شي مهم عن نفسي، الا وهو انو اني هواي اقلق واسترس واخاف من انشر شي عالنت، سواء ستوري بس اصدقائي يشوفوه او شي ممكن الاف الناس يشوفوه. لساتني دا اشتغل ع هاي المشكلة ودا احاول اتغلب عليها شوية شوية.
 
اول خطوة سويتها للتغلب ع هذا الخوف هو ان انشر بأسم ثاني يشملني، مثلا مقالي اللي يننشر ع صفحة العراقي العلمي وبعدين اخر شي يذكر اسمي. هالشي خلاني اتشجع واكول انو لا بأس هالشي مو بس مني، شكو بيها اذا نشرتة؟
ثاني خطوة هي ان اتقبل النقد حتلو جان مو بناء، لان شي اكيد مستحيل الكل يوافقني الرأي او يعجبة اللي اسويه.
ثالث شي هو انو ما اركز عالاشياء السلبية الشوية واعوف كل الاشياء الايجابية الحلوة اللي تجي وياها.
ورابع شي انو استمر بالمحاولة والعمل مهما كان لان اكيد راح اتطور.

زييييييييييييييييييين، شنو الخطوات القادمة؟

حاليا عندي كم هدف اساسيات اريد احققهم:

الاول: اسوي فديو تعليمي بسيط ع البرامج اللي استخدمتها واحسن طريقة لاستغلالها.

الثاني: ان اوسع نطاق شغلي واحاول الكة منظمات وجهات ثانية تستفاد من ترجمتي.

الثالث: ان استمر اترجم وي صفحة العراقي العلمي لانها راح تبقة كتدريب وتطوير لمهارتي.

الرابع: ابدي مدونة جديدة بموضوع جديد لان جدا استمتعت بتدوين تجربتي.

زييييييييييييييييييييييين، اني كشخص يريد يسوي هيج تحدي مثلج، شتنصحيني؟

- ابدو اليوم قبل باجر، لتتعاجزون، لان هاي جانت اكبر غلطة بالنسبة الي. سوو كلشي اول بأول

- الكو شي ملهم الكم يدفعكم ان تستمرون، مثلا المقالات شوية جانت روتينية او مملة الي بس استمتعت بالفديوات جدا.

- حاولوا تخلون نفسكم بكروب ناس ديسوون ويشتغلون مثلكم مثل ما سوينا احنا هنا.

- استمروا حتلو صارت الظروف صعبة وان كان شي كلشش بسيط، مثلا خلال هالفترة لابتوبي عطل واضطريت اشتغل عالفون الى ان انحلت المشكلة، وجاهدت رغم الصعوبات.

- واخيرااا وليس اخرا: مو مشكلة اذا تغيرت الخطة لو تعبنا لو تخاذلنا شوية، اهم شي منستسلم ونرجع نحاول بأسرع ما يمكن وكلشي يسهل. متخيلين اني جنت مقدمة ع مسابقة مال ترجمة وفاتني الوقت؟ عادي تواصلت وياهم بعدين كالأسد ومنتظرة الرد.

شكرااا لان بقيتو وقريتو للنهاية، اتمنى تكونون استفاديتو من هاي التجربة وان شاء الله تساعدكم في حال بديتو هيج تحدي وي نفسكم.